ACCOLTA

Benvenuti annant’à u nostru situ !

[… VERSIONE IN FACCENDA …]

Squali in u Mediterraniu ? In l’acque di Corsica ?

Sarà una macagna nò ? Lascemu corre e chjachjare, lascemu a maghjina di e « Dents de la mer » à i scenaristi di quelli filmi a sensazione postu ch’ella hè bella seria : squali ingiru à a Corsica ci sò. Suvente, sti « mostri marini » ùn piacenu tantu à a ghjente postu ch’elli ùn sò micca cunnisciuti bè. U nostru travagliu cerca tandu à arrecà elementi serii di cunniscenza in direzzione di i publichi i più varii ; stu situ ne custituisce una di e so spressione.

pecheurs-de-requins-caraffa-bisRitrattu ineditu di Ghjuvan Battista (Tito) di Caraffa © cullezzione Palazzo Caraffa – Cità di Bastia

I squali di u Mediterraniu anu fattu l’ughjettu di studii pochi è scarsi. Tito de Caraffa (1858-1936) eppò i biulugisti marini Paul Rancurel è Roger Miniconi sò stati in stu duminiu precursori isulani. Ma ci tocca à travaglià à longu andà, scrivendusi in un spaziu geugraficu più largu. U nostru associu Corsica – Gruppu di Ricerca annantu à i Squali di u Mediterraniu si scrive puru in st’andatura è, di modu più pricisu, in u filu di u Mediterranean Shark Research Group, creatu d’estatina 2000, à l’iniziativa di un gruppu di cercatori chì vulianu prumove una reta d’infurmazione frà i varii ittiologisti è naturalisti studiendu i squali. I fundatori ne sò stati u talianu Alessandro de Maddalena (Italian Great White Shark Data Bank), u sluvenu Lovrenc Lipej (Marina Biological Station Piran) è i spagnoli Joan Barrull è Isabel Mate (Barcelona Museum of Zoology).

L’inseme di i membri di stu gruppu sò di paesi chì t’anu una fascia mediterranea (ancu s’ella hè pussibule l’integrazione di cercatori di u mondu sanu, fintantu chì l’intaressu è i travagli passati o futuri portinu annantu à a zona maritima cunsiderata). Cume dicisa à principiu, stu gruppu europeu ùn hè micca un associu ufficiale è ùn hà micca presidente.

Ancu s’elle ponu impegnà l’inseme di i membri, l’attività si ponu cunfinà à aghje geugrafiche pricise.

Ghjè u casu di a Corsica. In u 2011, Vincent Maliet, passiunatu di squali, autore è curretore di schede annantu à u situ web DORIS (CNEB-FFESSM), travagliendu in leia incù Alessandro de Maddalena è altri scientifichi hà creatu ufficialmente un associu di legge 1901, specificu à u studiu, a cunservazione è a sparghjera scientifica è culturale di i squalidei chì campanu in l’acque isulane. Sta struttura, situata in Aiacciu, hè aparta à ogni parsona chì s’intaressa à l’elasmobranchi (vale à dì simpliciamente squali è raze) è chì vularia arrecà a so cuntribuzione.

U scopu ne hè in particulare di racoglie dati ch’ùn sò micca cunnisciuti da i scientifichi, di centralizalli è di sparghjeli sicondu à l’urientazione e più bone pussibule versu i specialisti cuncernati, finch’è di riculmà pocu à pocu e mancanze chì si palesanu in a cunniscenza di sti pesci cartilaghjinosi.

À livellu regiunale, u gruppu corsu t’hà l’ambizione di travaglià annantu à l’inseme di u territoriu isulanu, in partinariatu incù e rete chì esistenu, cum’è l’universitarii, l’associi impegnati in l’usservazione di i cetacei, o a reta di l’arinamenti, di i ciuttadori sottumarini, di i cacciadori sottumarini, di i pescadori prufissiunali o d’asgiu… T’hà cum’è scopu un cambiamentu in i mezi di studiu pà cuntribuisce megliu à a prugressione di e cunniscenze di l’elasmobranchi.

In u Mediterraniu, i squali sò gravamente minacciati di sparizione. Un studiu scientificu cunduttu in u 2008 face vede a calata chjara di e spezie durante sti dui ultimi seculi, di 97%, pà ciò chì tocca à u numaru è à u pesu. Certe spezie sò tocche di manera diretta vicinu à a Corsica, cum’è i pesci martelli chì e prese sò poche in mare Ligura è in mare Tirreniu. I dati demugrafichi fermanu difficiule à buscà : a pesca sibulata –mintulemu una piscaria artisgianale viraninca à u Nordu di l’Adriatica, sibulendu e mustelle (Mustelus sp) è i spinaroli (Squalus sp) è un’altra in u golfu di Gabes (Tunisia) pà a pesca di e mustelle, di u squalu grisgiu (Carcharhinus plumbeus) è di e raze ghitare (rhinobatos sp)-, ùn esiste nisunu quotà pà a cumercialisazione è i paesi ingiru à u Mediterraniu sò unipochi…

Colpa à a pesca intensiva, omancu 11 spezie di squali è di raze sò minacciate in l’acque di Francia metrupulitana, sicondu à i resultati di u 2013 di a Liste Rouge des espèces menacées en France.

Ognunu s’intarrugheghja in quantu à i squali. Ci tocca tandu à impegnassi à prò di una missione di sparghjera culturale è scientifica da risponde, per esempiu, à dumande cum’è quessa quì : « D’apressu à certi scientifichi, i squali s’avvicinanu di più in più di a Corsica. E spezie e più scuperte serebbenu quelle ch’o chjameraghju : « i squali-martelli  » è  « i squali-pelegrini ». Chi ne pensate voi, ne cunniscite d’altri, forse? »

lingua corsa

.

log

version française drapeau_francais

Annunci

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione /  Modifica )

Google photo

Stai commentando usando il tuo account Google. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

Connessione a %s...